'tonsi' li jo e kon nimi tu:
#1 la, 'tonsi' li meli ala li mije ala.
#2 la, 'tonsi' li pilin e ni: "mi jo e sijelo mije, taso mi meli." anu la, "mi jo e sijelo meli, taso mi mije."
'tonsi' li nimi pi pu ala. taso jan mute li toki e ni: ona li suli sama nimi pu.
jan inwin li pali e nimi 'tonsi' lon tenpo sike #2019. 'tonsi' li tan nimi '同志' pi toki Sonko.
kulupu tonsi li jo e len kule.
kijetesantakalu tonsi li lanpan ala lanpan e soko?
tan jan Nesapa
tan tenpo sike pini
toki pona li ken ala e kalama /wu/ e /wo/ e /ji/ e /ti/. ni la ona mute ni kalama wuwojiti.
ma Sawusi? ona li wuwojiti a!
tan jan Nesapa
tan tenpo sike pini
soko
soko li kili. taso ona li kasi ala. soko mute li ike tawa jan, li moku ala. soko lili li moku pona.
sitelen Emosi la soko li ni: 🍄.
jan inwin en kala kala li pali e nimi ni lon tenpo sike #2019. ona li nimi ku suli, li tan nimi სოკო (sok’o) pi toki Katelo.
mi alasa e soko lon ma kasi suli.
tan jan Nesapa
tan tenpo sike pini
mulapisu li moku pan. ona li tan ma Italija, taso tenpo ni la jan pi ma mute li moku e ona. nimi ona pi toki Italija li 'pizza'. jan li pana e kili e ko pi telo mama e ijo mute sin (kili anu soweli anu kala anu waso anu ijo ante) tawa pan lipu la mulapisu li kama.
nimi 'mulapisu' li tan jan Sonja tan tenpo sike #2019. ona li nimi ku lili li nimi musi. kama sona pi tenpo sike #2022 la jan pi lili mute (7%) li kepeken e ona.
mi moku e mulapisu lon poka pi jan pona.
tan jan Nesapa
tan tenpo sike pini
'jasima' li jo e kon nimi mute.
#1 la 'jasima' li 'pana sin'. sina kalama suli tawa nena suli la nena li ken pana sin e kalama. ni li jasima kalama. sina lukin e sinpin pi telo suli awen la telo suli li pana lukin e sinpin sina. ni li jasima suno. jasima suno li nasa tan ni: ona li ante e poka. sina pana e ilo jasima 🪞 tawa sinpin sina la sina ken lukin e sina lon selo pi ilo jasima. lukin la sinpin sina lon en sinpin sina pi ilo jasima li sama mute. ni taso li ante: ijo li lon poka seme. ijo li lon poka open la ilo jasima li pana lukin e ni: ona li lon poka pini. ni li jasima.
#2 la 'jasima' li ante ale, sama ni: walo li jasima tawa pimeja.
nimi ni li nimi ku suli. jan pi mute ala (47%) li kepeken e ona. jan Wesu en jan Maliku en jan Kisinja en jan inwin li mama e ona lon tenpo sike #2018 tan nimi 'yansıtmak' pi toki Tuki.
tenpo pimeja la telo suli li jasima e mun.
tan jan Nesapa
tan tenpo sike pini
'epi' li pilin. jan li wile ku la ona li epi. jan li ken ku la ona li kama pilin epiku (pona wawa).
lipu ku li kama lon tomo mi lon tenpo kama, la mi epi.
tan jan Nesapa
tan tenpo sike pini
jan li lanpan e ijo la ona li kama jo e ijo. tenpo mute la jan li kepeken e nimi 'lanpan' tawa ijo ike. ni la 'lanpan' li sama 'kama jo ike". jan li 'lanpan e pan,' la ona li 'kama jo e pan tan tomo esun kepeken ala mani'. lanpan ni li ike. taso tenpo la jan li kepeken e nimi 'lanpan' tawa ijo pi ike ala kin.
lanpan li nimi ku suli. kama sona pi tenpo sike #2022 la jan mute (52%) li kepeken e nimi ni. jan Wesu en jan Maliku en jan inwin li pali e ona lon tenpo sike #2017 tan nimi 'λαμβάνω' pi toki Elena.
o lanpan e pan!
tan jan Nesapa
tan tenpo sike pini
nimi 'kuntu' li tan nimi 'kalama musi tan uta' ('k.m.t.u.'). jan li pilin musi la ona li pana e kalama musi tan uta. ni li kuntu. ijo musi li pana e kuntu la ona kin li kuntu. jan li pana e kuntu tawa jan ante la jan #1 li kuntu e jan #2. sina ken kepeken e nimi 'kuntu' taso lon tenpo ni: sina pilin musi.
nimi ni li nimi ku lili. jan Wesu en jan Maliku en jan inwin li pali e ona lon tenpo sike #2018. kama sona pi tenpo sike #2022 la jan pi lili mute (7%) li kepeken e ona.
mi pana e sitelen kuntu tawa jan pona mi la mi ken kuntu e ona a!
tan jan Nesapa
tan tenpo sike pini
'linluwi' li jo e kon mute.
#1 la 'linluwi' li ijo insa. 'linluwi' li lon insa pi ijo tu anu mute la ijo tu anu mute li kama kulupu wan.
#2 la 'linluwi' li ilo. ilo ni li linja e ilo sona. jan li ken pana e toki e sona kepeken ilo ni. lipu ni kin li lon 'linluwi'!
nimi ni li tan jan inwin tan tenpo sike #2017 tan nimi 'rhyngrwyd' pi toki Kinla. ona li nimi ku lili. jan pi mute ala (29%) li kepeken e ona.
nasin li linluwi e ma tomo ale.
mi pana e lipu mi lon linluwi.
tan jan Nesapa
tan tenpo sike pini
'unu' li laso loje: 🟣
'unu' li nimi ku lili. kama sona pi tenpo sike #2022 la jan lili (12%) li kepeken e ona. jan Sonja li mama e ona lon tenpo sike #2020 tan nimi 'ungu' pi toki Malaju.
jan sama mi li kama jo e len unu.
tan jan Nesapa
tan tenpo sike pini
nimisin li nimi sin.
sina wile ala wile e nimisin mute?
tan jan Nesapa
tan tenpo sike pini
nimi 'n' li sama mute nimi 'a'. taso ante li ni: jan li open ala e uta la jan li ken ala kalama e nimi 'a'. taso jan li ken kalama e nimi 'n' kepeken nena ona taso kepeken uta open ala! jan li kepeken mute e nimi 'n' lon tenpo ni: ona li toki insa.
kala kala li pali e nimi ni lon tenpo #2021. jan mute (68%) li kepeken e ona. ona li nimi ku suli. sitelen pona la sina pana e palisa wan lon sewi pi sitelen Lasina "n" la sina ken sitelen e nimi ni.
n... mi sona ala.
tan jan Nesapa
tan tenpo sike pini
nimi 'epiku' li tan nimi 'epic' pi toki Inli, li jo e kon nimi ni: ijo li pona wawa. ona li nimi ku suli. jan Jan en jan Peche li pali e ona lon tenpo #2019. kama sona pi tenpo sike #2022 la jan pi mute ala (44%) li kepeken e nimi ni.
sitelen tawa sina li epiku a!
tan jan Nesapa
tan tenpo sike pini
Pingo li tomo tawa. ona li tawa lon ma, li jo e sike tu tu, li ken ala jo e jan mute.
Pingo li nimi musi, li nimi ku lili. jan Likipi li mama e nimi ni lon tenpo sike #2020. ona li tan ala toki ante.
sitelen pona la Pingo li sama sitelen Lasina 'P'.
mi lon insa pi Pingo sina.
tan jan Nesapa
tan tenpo sike pini
nimi 'noka' en nimi 'luka' li kama wan la nimi 'loka' li kama. ona li nimi musi.
ona li nimi ku lili. kama sona pi tenpo sike #2022 la jan pi lili mute (2%) li kepeken e ona.
soweli li tawa kepeken loka tu tu.
tan jan Nesapa
tan tenpo sike pini
'sutopatikuna' li soweli telo pi ma Oselija. nasa la ona li pana e sike mama sama akesi sama waso. lukin la uta ona li sama waso. (taso uta ni li kiwen ala. ni li sama ala waso.) ante la, nimi 'sutopatikuna' li jo e nasa. ona li jo e kalama /ti/. nasin pi toki pona la kalama /ti/ o kalama /si/. taso sutopatikuna li nasa li sama ala soweli ante mute la ni li pona: nimi 'sutopatikuna' kin li nasa li sama ala nimi ante mute pi toki pona.
palisa ike li lon noka pi sutopatikuna mije.
tan jan Nesapa
tan tenpo sike pini